viernes, julio 30, 2010

Tragu de Branu: Cuba-Libre Obreru

Famosu nel mundu enteru, o al menos nel mio mundu enteru, el cubalibre obreru tamién conocíu como calimochu o Kalimotxo per los más modernos, ye una d'eses bebíes que me paecen fonderamente bones pal branu y los sos calores. Bona y cenciella habría que decir perque la receta ye tan simple como echar xelu n'un vasu anchu,cubrílu con vinu tintu al gustu y completar con refrescu de cola. Una cosa que llama la atención ye que non per cenciella esta bebida dexa de tener el so ritual y la so cultura. Fae años que se descute en foros alrodiu de temes como el tipu de vinu, el típu de refrescu, que si la temperatura bona, que si el recipiente apropiáu, etc...


Yo nun se cuala ye la meyor maniera de facelu, pero sí se cual ye la que más me presta: Un vinu razonablemente bonu- un tintu xoven del añu; Rioja, Bierzo o Mancha son los mios preferíos, y refrescu de cola de los americanonos -esi de la chispa de la vida, servío todo ello con tres piedres de xelu en vasu sidra. Tastiáy-lo y cunta-y depués, veréis que ye prestoso, pallabra. Haiga Salú

viernes, julio 23, 2010

Festival del Lúpulo El Carmín

N'esti Fin de Selmana que güey empieza entamase na plaza les Campes en Pola de Sieru el primer Certamen Cultural de la Cerveza de Pola siero.

Alcuentru entamáu por delles cerveceríes de la rexión y hosteleros de La Pola,punto Radio con el sofitu del Ayuntamientu de Siero.

N'esti certamen cerveceru podemos atopamos con 15 carpes dedicaes a la cerveza de importación y nacional onde poder degustar más de 60 variedaes destintes de la nuesa bebida favorita ya que cada stand tendrá un par de cerveces de barril de destintes nacionalidaes cerveceres-toes elles diferentes, nun se repite cerveza- y 5 de botella. Además dos de les carpes tarán dedicaes tamién al bon yantar con platos típicos de la zona y tamién muestres de gastronomía cervecera.L'eventu cuntará tamién con música en direutu, charles sobre cultura cervecera y un torneu de dardos, tou ello embebío nel ambiente socialiable y socializante que la cerveza enfota. Per ellí mos veremos, nun hay dubia. Haiga Salú