martes, noviembre 25, 2008

Rumbu a Edina

(English Version)

N'unes hores colo pa Edinburgh. Toy emocionáu, fae 4 años dende que marchara d'ellí....A parte de too lo rellacionao con la boda de los mios collacios, habrá tiempu pa la cerveza. Por exemplu tendré tiempu pa'l retu de 25 pintes en 5 díes- nel mio añoráu Half Way House pa asína poder probar tóo lo más novedoso en cask ale del panorama independiente Escocés. Claro que, habrá más porque el xueves tenemos un Pub Crawling-tuve l'honor de asesoriar la stag party del mio pal, y a lo llargo de la semana caeran les visites a les fábriques, al whisky Heritage-pa eso ye primu hermanu de la cerveza, el viaxe fasta los cerveceros artesanos de la Stewart, asína como day una segunda vuelta-por fín in situ, al futuru de les micro artesaneles britániques, Brewdog....Parez muncha cerveza, pero de xuru que dexamos algo ensin probar. Fasta que torniemos, Haiga Salú




La semeya ye d'una de Pinta de Good rich ale que tomara yo n'el Jolly Judge, Lawn Market, Edinburg






P.S. N'esti enllace a Buy Beer tenéis les cerveceres independientes escoceses y n'esti a Pivní Filosóf la curiosa review a tres bandes que el filósofo- y los sos collacios Evan Rail y Velky Al , ficier n unes semanes atrás alrodiu de la Punk IPA de brewdog. Más que recomendables ámbos enllaces pa' tar al día con l'escena escuecesa.

lunes, noviembre 17, 2008

Cerveces de Seronda

Nel post anterior el mio collaciu Dotor, entrugabame por les cerveces que se suelen tomar n'esti tiempu asína como si conocía delles cerveces que se bebieren calentes. Como me paez una entruga interesante abondo decidime per escribir un post acerca d'esti tema. Dedicáu quede a la salú del nomáu médicu-de la barriga que diría otru collaciu pero n'esti casu italianu, a la so muyer y al so gordu que cada día tá más guapu.Haiga Salú

Si dalgo me presta de les cerveces ye la capacidá plena que tienen pa adaptase a les estaciones. los que los anglosaxones engloben nel términu seasonal, y que podríemos traducir como cerveces de temporada. Na mio opinión esto ye la expresión praútica de lo tremendamente versátil que puede llegar a ser la cerveza, de les carálterístiques propies y auténtiques que la faen ser una bebida noble con una cultura abondo grande.




A mí n'esta época y n'esta zona del norte de la península onde'l fríu pega duru cuando pega prestame tomar delles cerveces que me paecen más que apropiaes y de pasu viaxo por Europa dende un vasu, algo que m'encata facer, imaxinando sitios que visitar o recordando los visitaos y a lo so xente. Asína Vamos fasta Alemaña pa desfrutar de les Bock y les doppelbock, tan apeteceeres pa' esti tiempu. Los xermanos por exemplu n'Ochobre empezabense a beber les cerveces que habíen tao guardaes tol veranu reposando-en cueves ya sotanos fríos dende Marzu, últimu mes lo suficiente fríu como pa poder facer cerveza na época cuando nun había refrixeración industrial. A estes cerveces orixinaries de la Rexión de la Baxa Saxonia, llamaranles bock-derivación de Beck, a pocope de Einbeck el pueblo a les afueres de Hannover d'onde proveníen.Yeren, cerveces a les que sos añadía más cantidad de malta pa que les llevaúres tuvieren más tiempu actives y producieren más alcohol lo que permitía la conservación. Tamién se vió que la guarda llarga en fríu acondicionaba la cerveza d'una manera particulare, dandoy les propiedaes que güey podemos desfrutar. Les bock y doppelbock por tantu son dos de los tipos de cerveza que meyor peguen con esta época del añu.Cerveces con un poco más de alcohol, más maltoses y de más cuerpu que se adauten perfectamente al fríu de seronda y tamién a la cocína d'esta época, más consistente y como decimos equí, de platu. Añadir que son cerveces pa tomar fresques, que no fríes. Einbecker, Spaten bock, Belli-Bock, Triumphator Lowenbrau son algunes de les cerveces de temporada(aunque hayles to'l añu) que podéis beber n'Asturies na seronda. Equí, Equí ya Equí, podréis atopales.







Si dende otru vasu mos arrimamos a Gran Bretaña, ablucaremos como yos presta tomar strong ales y winter warmers. Les primeres son lliteralmente ales fuertes,oscures, maltoses, con bon gradu alcohólicu, munches d'elles con guarda en maera y mezcla de dos o más ales. La mano del mezclaor equí, como si d'un alquimiste tratariase, xuega un papel fundamental pa da-y forma a la cerveza. Son cerveces de munchu cuerpu, sabores añejos, tonos a maera, frutes forneaes, toffe y lixeramente amargaes co los llúpulos británicos. Si les pones al lláu de un bon quesu curáu, tendrás una cena perfeuta. Les winter warmer son lliteralmente eso, bebides pa calentare. Ales más fuertes, con más malta, clares o ambarines, pa que la malta muy tostada nun solape los sabores a cereal, frutes y especiaes, lleven más alcohol-alrodiu de los 5% BV lo que ye muncho pa les ales britániques y a veces, pueden tar aliñaes con miel o frutes-n'especial prunos y cirueles pases. Destacar equí que les honey porters y les milk stout pueden ser otros dos tipos de cerveces muy recomendables pa esti tiempu. A tomar a ser posible del tiempu, o fresques pero nunca fríes porque pierden el sabor. Strong Suffolk, Youngs London Ale, Samuel Smith Winter Warmer, Saint Peter's Honey Ale. Son delles de les ales que se pueden atopar n'esta època en Asturies. Equí ya Equí podéis topáles






Una tradición belga muy curiosa pa esta época ye la de la cerveza caliente. Tratase xeneralmente de lambic de frutes, preferiblemente les de guindes( Kriek) cocíes a fuéu lentu con clavu, canela, piel de llimón y un poco de azúcare prieto. Mantiense caliente n'un recipiente al usu pa poder desfrutar d'ello siempre a la temperatura ideal. Sorprendente ye la palabra porque en realidá esperes otra cosa y sin embargo la combinación de sabores, los aromas que desprendi y el calorín que da son abondu reconfortantes. N'Asturies toparasla cuando llega la Seronda y durante tóu l'iviernu Equí.







Dexo pal final la más desconocía de toes pero también la más nuesa. Collotu, como dellos saben, tuvo cervecera durante munchos años. Los trabayaores de la fábrica cuando llegaba'l fríu tomaben la cerveza del tiempu, recien fermentao, enantes de metela nes bodegues a acondicionar o xusto cuando llevaben pocu tiempu acondicionaes. Esta costumbre fizo paladar y nos meses frescos solíen preparar lo que llamaben un "Pénjamo"** ¿Y que yera eso? pues ni más ni menos que la cerveza que facíen calentada con canela na seronda y con miel y canela nel iviernu. Les cocines de los chigres, y los propios chigres enllenabense del golor de la mezcla que facía apeteceero tomar un vasu fasta a los menos cerveceros. Güey la nuesa cervecera ya nun existe más, pero en casa suelo preparar Pénjamos con DAB Dortmunder Pils y con Pilsner Urquell, porque entre les propiedaes d' estes dos cerveces situense los arumes y los sabores del Águila Negra. Facey la preba, gustaravos.


Estes, collacios, son les que yo conozco y les que tastié y tastio con gran placer cuando llega la Seronda y anicia'l fríu. Imaxino que habrá más y por ello vos paso la entruga que me ficieren a mí, pa'entre tóus, recopilar la mayore cantidá de cerveces de temporada posibles. Haiga Salú





**Pénjamo
ye el nome d'una barriada asturiana, sita nel conceyu de Llangréu ya tamién un pueblu Mexicanu, de l'estáu de Guanajuato. Ye fácil que'l home o la muyer que ideare esta bébida fueren oriundos d'ellí. Ye lo que me se vien a la sesera al descurrir l'oríxen de tan peculiar mezcla.




jueves, noviembre 06, 2008

Tiempu de Seronda

Llega la seronda, época de recoyer frutu, de colores pardos nel monte, de llugáes de sol en díes nubles. Ye tiempu de guetar, caleyar per entri castañales apañando el so ricu frutu. Tiempu ye tamién de dir a la raya entre Asturies y Lleón: Valle del Luna, Omañes o Babia y disfrutar de la micoloxía. Mio casa por estes feches enllenase de castañes, setes y sidra vieyo que tomar xunto con la sidra dulce recien mayao-esa misma que por arte de la naturaleza dará en primaveira sidra nuevo y sabroso. Nun falta tampoco el vinu tintu, reconfortaor del alma y dende lluego la cerveza de temporada. Ye esti el momentu de desfrutar de bock y doppelbock, de strong ales y de los primeros barley wines, cerveces toes elles que dan sentíu al carálter vivu de la cerveza.Haiga Salú na Seronda


P.S.- Si vos preguntáis por les semeyes siento decivos que nun les hay.Tengo l'ordenador estrozáu, ya escribir de prestáu, cortesía del trabayu, nun me permite más que actualizar asína. Mala sombra d'informática, viruses y mal usu.